عمر فاروقؓ کا تذکرہ ہی عدل کا تذکرہ ہے

تحریر : سیدہ حفظہ احمد

خلیفہ ثانی حضرت سیدنا عمر فاروقؓ(یوم شہادت یکم محرم الحرام)

کیا آپ ایسے شخص کو جانتے ہیں:

جو عرب کے سترہ پڑھے لکھے لوگوں میں شمار ہوتا ہو؟
کیا آپ ایسے شخص کو جانتے ہیں:
جو اسلام سے پہلے مسلمان کے خلاف بولتا ہو اور دل میں بغض لیے کہتا ہو کہ یہ تو شاعر ہے (نعوذ باللہ من ذلک) تو قرآن جیسی مقدس کتاب اس کا جواب دیتی ہو کہ "وما ھو بقول شاعر"۔
جب وہ سوچتا ہو کہ یہ تو بڑا کاہن ہے (نعوذ باللہ من ذلک) تو قرآن پھر جواب دیتا ہو "وما بقول کاھن"۔ اس وقت اس کے دل میں اسلام کا رعب و دبدبہ پیوست ہوجاتا ہو۔
کیا آپ ایسے شخص کو جانتے ہیں :
جو نبی ﷺ کو قتل کےارادے سے نکلا ہو لیکن خود دین کے آگے سورۃ طه کی آیت "اننی انا اللہ لا الہ الا انا فاعبدنی" سن کر کانپ جاتا ہو، دوڑتا ہوا نبی ﷺ کی خدمت میں حاضر ہوا ہو کہ آج میں بری نیت لے کر نہیں آیا۔
کیا آپ ایسے شخص کو جانتے ہیں:
جو نبی ﷺ کی دعاؤں کا ثمر ہو نبی ﷺ کا انتخاب ہو؟

کیا آپ ایسے شخص کو جانتے ہیں:
جس کے اسلام قبول کرنے کے بعد دین کو تقویت ملی ہو جس کا ایمان لانا مسلمانوں کی عزت کا سبب بنا ہو؟
کیا آپ ایسے شخص کو جانتے ہیں:
جس نے علی الاعلان کعبہ کی چھت پر پہلی بار اذان دی ہو کہ اب خانہ کعبہ میں نماز کی جماعت کی جائے گی۔
کیا آپ ایسے شخص کو جانتے ہیں:
جو اسلام سے پہلے اپنے رعب سے متاثر کرتا ہو لیکن اسلام لانے کے بعد نبی عربی کا خادم بن گیا ہو؟
کیا آپ ایسے شخص کو جانتے ہیں:
جو اسلام قبول کرنے کے بعد ایک ایک کافر کے گھر جاکر اسے پکار پکار کر بتاتا ہو کہ میں اسلام قبول کر چکا ہوں اور اعلان کرواتا ہو کہ جس نے بیوی کو بیوہ، بچوں کو یتیم کرنا ہو، ماں باپ کی کمر کو جھکانا ہو تو وہ عمر کے مقابلے میں آئے؟
کیا آپ ایسے شخص کو جانتے ہیں:
جس کو دیکھ کر شیطان اپنا راستہ بدل لیتا ہو؟
کیا آپ ایسے شخص کو جانتے ہیں :
جو اس بات کے ڈر سے قرآن کی تدوین کا مشورہ دیتے ہوں کہ قرآن میں پہلی کتابوں کی طرح تحریف نہ ہوجائے اور کہیں ایسا نہ کو کہ ہم اصل میں ملاوٹ کر بیٹھیں؟
کیا آپ ایسے شخص کو جانتے ہیں:
جس کی خلافت مسلمانوں کے لیے رحمت شمار کی جاتی ہو؟
کیا آپ ایسے شخص کو جانتے ہیں:
جس نے بائیس لاکھ مربع میل پر حکومت کی ہو اور عدل کی وجہ سے مشہور ہوا ہو؟
کیا آپ ایسے شخص کو جانتے ہیں:
جس کے جاہ و جلال کی وجہ سے زمین کانپتے ہوئے سہم گئی ہو؟
کیا آپ ایسے شخص کو جانتے ہیں:
جس کی وجہ سے دریائے نیل جاری ہوا ہو؟
کیا آپ ایسے شخص کو جانتے ہیں:
جو خلیفہ ہوتے ہوئے بھی پیوند لگے کپڑے پہن کر یہ سوچتا ہو کہ فرات کے پاس ایک کتا بھی بھوکا مرجائے تو اس کا جواب دہ میں ہوں گا؟
کیا آپ ایسے شخص کو جانتے ہیں:
امیر المؤمنین ہوتے ہوئے رات کو بھیس بدل کر مدینے کی گلیوں میں گشت کیا کرتا ہو؟
کیا آپ ایسے شخص کو جانتے ہیں:
جو دن کو لوگوں کی مشکلات سنتا ہو رات کو ان کی مشکلات چھپ کر حل کیا کرتا ہو؟
کیا آپ ایسے شخص کو جانتے ہیں:
جو درخت (کیکر) کے نیچے تکیے کی جگہ اینٹ لگا کر سونے کو ترجیح دیتا ہو؟
کیا آپ ایسے شخص کو جانتے ہیں:
جو صاحب الہام ہو، جسے یہ معلوم ہوجائے کہ بکری کی ٹانگ پل پر ٹوٹ گئی ہے اور اس بات پر روتا ہو کہ اب اللہ مجھ سے پوچھے گا کہ تو نے پُل ٹھیک کیوں نہ کروایا؟
کیا آپ ایسے شخص کو جانتے ہیں :
جو بچوں اور ان کی ماں کی خبر گیری کرنے کے بعد عورت کی بات پر اتنا کہنے پر اکتفا کرتا ہو کہ جب تو کل امیر المؤمنین سے ملے گی تو مجھے بھی پالے گی؟
کیا آپ ایسے شخص کو جانتے ہیں :
جو امیر المؤمنین ہوتے ہوئے بھی مسجد میں جھاڑو دیتا ہو، بیوہ عورتوں کے گھر پانی بھرنے ان کا سودا سلف لینے جاتا ہو ان کے اونٹ چَراتا ہو؟
کیا آپ ایسے شخص کو جانتے ہیں :
جو خود بیت المال اونٹ تلاش کرنے نکلا ہو اس غرض سے کہ معلوم نہیں اس میں کتنے لوگوں کا حق ہوگا؟
کیا آپ ایسے شخص کو جانتے ہیں :
جس نے دس سال، چار ماہ، دس دن کی سلطنت امام عادل کی طرح نظم و ضبط سے قائم کی ہو ؟
کیا آپ ایسے شخص کو جانتے ہیں:
جو یہ کہتا ہو کہ تم لوگوں کو کیسے غلام بنا سکتے ہو جب کہ اللہ نے انسان کو آزاد پیدا کیا ہے؟
کیا آپ ایسے شخص کو جانتے ہیں :
جس کے بارے میں نبی ﷺ کی زوجہ محترمہ حضرت عائشہ صدیقہؓ فرماتی ہوں کہ اس (عمر ) کا تذ کرہ کیا کرو کیوں کہ اس (عمر) کا تذکرہ ہوتا ہے تو عدل کا تذکرہ ہوتا ہے، جب عدل کا تذکرہ ہوتا ہے تو اللہ کا تذکرہ ہوتا ہے۔
کیا آپ ایسے شخص کو جانتے ہیں :
جس کے عہد خلافت میں عراق شام اور مصر فتح کیا ہو؟
کیا آپ ایسے شخص کو جانتے ہیں :
جس کو دنیا میں ہی جنت کی بشارت مل گئی ہو؟ جس کے لیے نبی نے خواب میں ایک خوب صورت محل بھی دیکھا ہو؟
اس کے بعد بھی وہ وقت نزع کے وقت یہ کہتا ہو:
(ویل لك يا عمر : ان لم يغفر لك ربك)
تباہی ہے اگر اس رب نے مجھے نہ بخشا۔
کیا آپ ایسے شخص کو جانتے ہیں :
جس نے سب سے پہلے باقاعدہ فوج کا محکمہ قائم کیا ہو؟
اور فوجیوں کے وظائف مقرر کیے ہوں؟
کیا آپ ایسے شخص کو جانتے ہیں:
جس نے نبی ﷺ کے بائیں پہلو میں سونے (قبر) کی اجازت طلب کی ہو اور کہا ہو امیر المؤمنین کہہ کر نہ پوچھنا۔ پھر اجازت ملنے کے بعد بھی یہ کہا ہو کہ جب مجھے لے کر جاؤ تو ایک بار پھر اجازت طلب کرنا شاید مجبوری میں اجازت دے دی ہو؟
کیا آپ ایسے شخص کو جانتے ہیں:
جس کا دور خلافت اسلام کا سنہری دور کہلاتا ہو؟
اور کیا کیا کہوں الفاظ کہ ختم ہوگئے لیکن حق ادا نہ ہوسکے گا ..........
ہاں ہاں! یہ عمر ابن الخطاب ؓ ہیں۔
ہاں یہ عمر ابن الخطابؓ ہیں، جن کی پیدائش 586ء تا 590ء کے درمیان مکہ میں میں ہوئی تھی (ایک روایت کے مطابق ہجرت سے چالیس سال قبل آپ کی پیدائش ہوئی) اور جو نبی اکرم صلی اللہ علیہ وسلم سے تیرہ برس چھوٹے تھے۔
جی ہاں! یہ سسر نبی ﷺ ہیں۔ (بی بی حفصہؓ نبی امی ﷺ کے نکاح میں تھیں)
ہاں ہاں! یہ داماد علیؓ ہیں۔ (بی بی کلثومؓ حضرت علیؓ کی صاحبزادی حضرت عمرؓ کے نکاح میں تھیں)
جی ہاں! وہ ہی عمرؓ  جن کو نبی اکرم ﷺ نے فاروق اعظم کا لقب دیا۔
جی ہاں! یہ وہ ہی فاروق اعظم ہیں جن کی کنیت ابو حفص رضی اللہ تعالی عنہ تھی۔
جی ہاں! وہ ہی عمر جو نبی کا عمرو بن ہشام (ابو جہل ) کے بجائے انتخاب و دعا کا ثمرہ تھے اور اس دعا ہی کی بدولت آپ کو چھ نبوی میں اسلام قبول کرنے کا شرف نصیب ہوا۔
اور اب کیا کیا سپرد قرطاس کروں کہ قلم لرزتا ہے۔
جن کی وجہ سے دین اسلام کو تقویت ملی، نبی ﷺ کے لیے جن کی جان حاضر تَھی، جو فطرتا سخت مزاج تھے، لیکن خلیفہ بن کر اتنے نرم ہوگئے تھے، جن کی ہیبت اب کفار کے دلوں میں رچ بس گئی تھی۔
ہاں ہاں! عمر ابن الخطابؓ جو سادگی و اخلاق کے پیکر تھے۔
ہاں وہ عمر ابن الخاب! جو خلیفہ ثانی تھے اور تیرہ ہجری سے لے کر چوبیس ہجری تک انہوں نے بائیس لاکھ مربع میل پر حکومت کی۔
وہ عمر ابن الخطابؓ جس نے ایسے معاشرے کی طرف توجہ مبذول کروائی، جس میں انسانی ہمدردی، عوامی فلاح و بہبود، زراعت کی ترقی اور خصوصا عدل و انصاف جیسے اصولوں کی اہمیت کو اجاگر کیا۔
جی ہاں! وہ عمر ابن الخطابؓ جن کے نظام حکومت میں ایسی خوبیوں کا نمونہ تھی، جس میں حاکم، امیر ، عادل، اور دیگر عہدے دار اور خود خلیفہ لوگوں کے سامنے جواب دہ ہو۔
جی ہاں! جن میں سادگی، عدل و انصاف، رواداری، انتظامی معاملات میں سختی نمایاں تھی۔
جن کے بارے میں کہا جاتا ہے اگر اس دنیا میں ایسا ایک اور عمر پیدا ہوجاتا تو پوری دنیا پر مسلمانوں کی حکومت ہوتی۔
جی ہاں یہ تذکرہ عمر ابن الخاب ہی کا ہے، جن کو خنجر سے 27 ذی الحجہ 23 ہجری میں ایسا زخمی کیا گیا کہ وہ زخموں کی تاب نہ لا سکے اور بالآخر یکم محرم الحرام 24 ہجری کو جام شہادت نوش فرمایا...
آج تک عمر ابن الخطابؓ جیسا بیٹا نہ کسی ماں نے پیدا کیا، اور نہ ہی پیدا ہوسکے گا۔
اللہ تعالی سے دعا ہے کہ ہمیں ان کی سیرت سے اسلام کو سیکھنے سمجھنے اور اس پر عمل کرنے کی توفیق عطا فرمائے، تاکہ ایسا عدل ہم اپنے معاشرے میں قائم کرسکیں، دشمن ہمیں بری نگاہ سے نہ دیکھ سکے.... آمین

۲٤_اگست_۲۰۲۰

٤_محرم الحرام_١٤٤۲

اس کو بھی پڑھیں